Mitt internett - då www kom til Noreg

Vennskap, kåtskap og internett.
Dette er historia om då internett kom til Noreg, og det er ei historie om alt det fantastiske som skjer når du får sosiale medium som elleveåring.
 
Boka handlar om då internett vart allemannseige i nittiåra: Ein unik epoke i norsk mediehistorie då samfunnshierarkiet vart snudd opp ned og barn og unge var i førarsetet. 
 
Boka er blitt litt som internett sjølv. Ho inneheld veldig mykje rart. Her er den finske mannen som fann opp IRC, men som hatar å chatte. Programmeraren av Mirc, som ikkje vil møtast over skjerm. Den svenske artisten Basshunter er med, og sjølv om det ikkje handlar om teknologi, vil du forstå kvifor TCP/IP-protokollen kan vere det finaste som har skjedd deg.
 
I arbeidet med denne boka har Halvorsens viktigaste kjelde vore eigne dagbøker frå 1994 til 2000. For mest av alt handlar dette om Anne Gunn, vennene hennar og alle som på nattetid prøvde å taste så stille som mogleg, og som brukte kvar ledig stund til å snakke med framande på internett utan at foreldra visste kva dei dreiv med. Dei første som levde ungdomstida på internett.
Kva gjorde det med dei? 
Og kvifor nektar dei no eigne barn å oppleve det same?